Fərid Abdullah

Abdullayev Fərid Ağasəlim oğlu 1984-cü ildə Bakı şəhərində ziyalı ailəsində doğulmuşdur. İlk təhsilini bir zaman Hüseyn Cavidin adını daşımış 132 nömrəli ərəbtəmayüllü məktəbdə almışdır. Hələ məktəb vaxtından ictimai-yaradıcı işlərdə fəaliyyət göstərmiş, televiziya-radio, habelə müsabiqələrdə iştirak etmiş, müxtəlif fəxri fərman və diplomlarla təltif olunmuşdur. 2002-2004-cü illərdə hərbi xidmətdə olmuşdur. Hərbi xidmətdən sonra Ali ilahiyyat elmləri üzrə təhsil almış, həmçinin Bakı İslam Universitetini bitirmişdir. Daha sonra bu sahədə magistr təhsili almışdır. Bununla yanaşı, 2010-cu ildən bir sıra media şirkətlərində və təşkilatlarda çalışmış, həmin illərdən mətbuatda yüzlərlə məqalə və araşdırmalar, tərcümələr işləmişdir. Ərəb dilindən ana dilimizə bir neçə klassik və əhəmiyyətli kitabları tərcümə etmişdir. 2011-ci ildən Fərdi inkişaf sahəsində araşdırmalar, maarifləndirici təhqiqatlar aparır. Ailəlidir, iki övladı var.